hjerteteppe

Eg er så heldig å ha opptil fleire heimestrikka "slumreteppe" i ull med hjartemønster. Desse er noko av det kjæraste eg har, og dei er velbrukte! Det at det er ei herleg dame som har strikka dei, spelar sikkert og inn. Farmora til mann min er ei fantastisk gamal dame med langt grått hår tvinna opp med fliseklemmer, alltid strikketøy i hendene, utanom på sundagar, og ho er ein ivrig kortspelar. Ho strikkar desse teppa både i vaksen og barnestorleik. Ikkje kan eg forstå korleis nokon kan strikke noko så stort med så tynn tråd (!).

For ei stund sidan oppdaga eg oppskrifta på desse teppa i ei bok, og det viser seg at dette er ei gamal, tradisjonell oppskrift. Om du er interessert heiter boka Strikking, gammel teknikk i ny design.

Eg har hatt lyst til å strikke eit slikt teppe lenge, men ikkje orka tanken på å byrje på eit så stort prosjekt. Heilt til for nokre dagar sidan. Eg sa til meg sjølv at eg kan ihvertfall byrje, og heller leggje det vekk om eg skulle bli lei. Men det er jo så kjekt! :O) Eg strikkar i Baby Merino  frå Drops med pinnar nr. 4,5, så det går jo slett ikkje seint. Og så er mønsteret så greit, for ein vekslar mellom hjartemønster (som ikkje er vanskeleg), og rettstrikk. Det er dermed eit håndarbeide som fint passar å ha med i sosiale settingar og framfor tv'en, det likar me! :O)

Eg strikkar forresten i barnestorleik, må nok bli pensjonist før eg gir meg ut på eit stort ;O)


Ønsker alle ei god veke!